Liderët bëjnë homazhe në Prekaz

Për nder të ditës së dytë të Epopesë së UÇK-së, në kompleksin memorial në Prekaz kanë filluar homazhet nga qytetarë dhe personalitete të jetës politike. Homazhe në Prekaz ka bërë edhe kryeministri i Kosovës, Ramush Haradinaj, bashkë me disa nga ministrat e kabinetit qeveritar, përcjell albinfo.ch.

Ai më pas është pritur edhe në kullën e Jasharëve nga kryefamiljari Rifat Jashari.

Kryeministri ka thënë se Prekazi dhe rënia heroike e Komandantit Legjendar të Ushtrisë Çlirimtare të Kosovës, Adem Jashari dhe Familjes Jashari, janë moment i kthesës, dhembjes dhe krenarisë.

Edhe kryetari i Lëvizjes Vetëvendosje, Albin Kurti, ka bërë homazhe te varri i Komandantit Legjendar, Adem Jashari, e po ashtu është pritur nga kryefamiljari Rifat Jashari.

Për nder të 20-vjetorit të Epopesë së Ushtrisë Çlirimtare të Kosovës, homazhe te varrezat e familjes Jashari kanë bërë edhe kryetari i Skenderajt, Bekim Jashari dhe ai i Drenasit, Ramiz Lladrovci.

Kreu i Skenderajt, Bekim Jashari, tha se është obligim që përveç t’i nderojë dëshmorët, edhe të punohet për zhvillimin ekonomik.