Thaçi: Askush nuk mund të vërë veto për të ardhmen e Forcës së Sigurisë

"Ne duam dhe synojmë që forcat e armatosura të bëhen me ndryshime kushtetuese. Forcat e armatosura të Kosovës do të jenë vlerë e përbashkët e të gjithë neve”, ka theksuar ai

“Askush nuk mund të vërë veto për të ardhmen e Forcës së Sigurisë së Kosovës, sepse themelimi i ushtrisë së Kosovës është një e drejtë që na takon me Kushtetutë”, ka thënë komandanti suprem i FSK-së, presidenti Hashim Thaçi. Presidenti ka thënë se epopeja e UÇK-së është sublimmim i historisë së vendit për liri dhe pavarësi. Ai ka theksuar se rezistenca e Ushtrisë Çlirimtare e Kosovës ka bërë që bota demokratike të vërë në përdorim fuqinë më të madhe ushtarake në botë.

“Duke marrë parasysh përgatitjen tuaj, ju faktikisht po dëshmoni pjekuri dhe aftësi për të ushtruar funksionin tuaj themelor, atë të forcave të armatosura të Kosovës. Edhe pse sot është një ditë festive, nuk mund të themi se marshin tuaj nuk arriti ta përcillte politika. Ne duam dhe synojmë që forcat e armatosura të bëhen me ndryshime kushtetuese. Forcat e armatosura të Kosovës do të jenë vlerë e përbashkët e të gjithë neve”, ka theksuar ai.

Ndërsa kryeministri Ramush Haradinaj ka thënë se shndërrimi i FSK-së në Forca të Armatosura do të bëhet përmes ndryshimeve kushtetuese.

E Rifat Jashari ka thënë se familja Jashari ndihet krenare me të arriturat e kësaj force. Forca e Sigurisë së Kosovës, në nderim të epopesë, ka mbajtur parakalimin tashmë tradicional në kazermën “Adem Jashari” në Prishtinë.