Sela në Zvicër flet për diskriminim e shqiptarëve në Maqedoni

Ai në tubimin me mërgimtarët në Zvicër ishte i shoqëruar nga anëtarët e tjerë të lartë të kësaj partie, Arben Taravari, Agon Ferati, Elmi Aziri, Remzi Memedi

Kryetari i Aleancës për Shqiptarët, Ziadin Sela, ka pasur një debat me mërgimtarët në Zvicër.

“Fenomen i rrezikshëm që po i ndodh politikës shqiptare në Maqedoni, të verbuar nga gara për pushtet se kush i pari bëhet pjesë e Qeverisë. Ne jemi të shqetësuar për këtë çështje”, është shprehur Sela, njofton INA.

Ai është i shqetësuar që shqiptarët nuk po kanë ndikim në Parlamentin maqedonas, përcjell albinfo.ch.

“I tillë ishte pas zgjedhjeve të 2016, ku në Parlament përfunduam me katër parti politike, asnjëra me peshë politike reale. Ndërsa tani këto janë shndërruar në gjashtë subjekte, duke qenë të coptuar me deputetë, pa ndonjë peshë politike. Nuk janë rastësi këto çështje”, theksoi Sela.

Sipas tij, nuk janë të rastësishme zhvillimet brenda opozitës. “Nuk kanë qenë edhe të mangëta përpjekjet që zhvillimet që ndodhin në BESA të ndodhin edhe përbrenda ASH. Nuk kanë mundur të depërtojnë tek ne për të na krijuar ndarje dhe blloqe të ndara, sepse e kemi ndërtuar këtë strukturë partiake me shumë mund e sakrificë për një të ardhme më të mirë”, nënvizoi Sela.

Ai shtoi se fenomeni i rrjedhës së votës shqiptare në partitë shqiptare është shumë i rrezikshëm.

Sipas tij, partitë opozitare shqiptare, por edhe shqiptarët nuk janë të informuar se çfarë po ndodhë me procesin e bisedimeve për emrin.

“Nuk jemi të informuar se çfarë ndodhë lidhur me bisedimet me emrin. Por cilat janë gjërat që janë të papranueshme për shqiptarët. Ne si parti i japim përkrahje zgjidhjes së saj, por nuk pranojmë çfarëdo zgjidhje që i jep të drejtën maqedonasve për pronësinë shtetësinë duke e shndërruar shtet monoetnik maqedonas. I papranueshëm është propozimi për emërtimin në gjuhën maqedonase”, deklaroi Sela ku në tubimin me mërgimtarët në Zvicër ishte i shoqëruar nga anëtarët e tjerë të lartë të kësaj partie, Arben Taravari, Agon Ferati, Elmi Aziri, Remzi Memedi.