Qeveria miraton aneks marrëveshjen për demarkacionin

Haradinaj tha se tashmë janë krijuar kushtet dhe rrethanat që Kuvendi i Kosovës të jetë unik dhe ta ratifikojë marrëveshjen e demarkacionit mes Kosovës dhe Malit të Zi

Qeveria e Kosovës ka miratuar aneks marrëveshjen e nënshkruar mes presidentit të Kosovës Hashim Thaçi dhe atij të Malit të Zi, Filip Vujanovic, për rishikimin dhe korrektimin e drejtimit të Çakorrit dhe Kullës.

Kryeministri i Kosovës, Ramush Haradinaj, tha se tashmë janë krijuar kushtet dhe rrethanat që Kuvendi i Kosovës të jetë unik dhe ta ratifikojë marrëveshjen e demarkacionit mes Kosovës dhe Malit të Zi.

Në mbledhjen solemne në shënim të 10-vjetorit të Pavarësisë së Kosovës Haradinaj, ka kujtuar të gjithë të rënët nëpër breza për lirinë e Kosovës.

“Kosova e pavarur do të thotë një shtet më shumë në hartën gjeopolitike të Globit, një shtet pretendent për t’u anëtarësuar në OKB, NATO dhe BE si dhe në të gjitha organizatat tjera ndërkombëtare që i shërbejnë paqes dhe mirëkuptimit ndërmjet njerëzve e kombeve”, ka thënë ai.