Kosovari i vrarë në Siri është mërgimtar nga Gjermania

Babai i Kastriotit kishte shkuar të paktën dy herë për ta marrë atë nga Siria, por nuk kishte arritur ta bindte të birin që të kthehej

Kastriot Ademi nga Pestova e Vushtrrisë është kosovari i radhës i vrarë në Siri.

Ai iu është bashkuar pjesëtarëve të ISIS-it nga Gjermania, ku edhe jeton familja e tij.

Sipas mediave kosovare ai është vrarë më 2 shkurt, kurse familja e kishte marrë lajmin tre ditë më parë.

Familja e tij nuk ka pranuar të flasë në lidhje me këtë rast. Sipas burimeve të KTV-së, edhe vajza e axhës së Kastriot Ademit iu është bashkuar pjesëtarëve të grupit terrorist ISIS në Siri, përcjell albinfo.ch.

Babai i Kastriotit kishte shkuar të paktën dy herë për ta marrë atë nga Siria, por nuk kishte arritur ta bindte të birin që të kthehej.

Vrasja e Kastriot Ademit e çon në 75 numrin e shqiptarëve të Kosovës të vrarë në luftërat në Siri dhe Irak.

Sipas të dhënave zyrtare të Policisë së Kosovës, në zonën e konfliktit janë duke qëndruar 150 shtetas të Kosovës, prej tyre 50 fëmijë dhe 40 gra.