Bushati kërkon njohjen e Kosovës nga Greqia

Ministri i Jashtëm i Shqipërisë, Ditmir Bushati, ka kërkuar nga Greqia njohjen e pavarësisë së Kosovës nga ky shtet, përcjell albinfo.ch.

“Ne do të mirëprisnim dhe kërkojmë njohjen nga Greqia të Kosovës si shtet, sepse ne do ta shihnim këtë si një hap në drejtimin e duhur dhe si një investim për stabilitetin e rajonit tonë”, ka thënë Bushati në një intervistë për televizionin grek “Antena”.

“Pavarësisht se ku jetojnë shqiptarët në Ballkan, ata kanë dëshmuar në të kaluarën se janë element vitalë të stabilitetit demokratik dhe perspektivës Euro-Atlantike në rajonin tonë. I vetmi frymëzim që shqiptarët kanë është i lidhur me këtë proces, me integrimet euro-atlantike. Nuk I takon qeverisë shqiptare të flasë për shembull për marrëdhëniet mes Greqisë dhe Kosovës. Natyrisht, ne do të mirëprisnim dhe kërkojmë njohjen nga Greqia të Kosovës si shtet, sepse ne do ta shihnim këtë si një hap në drejtimin e duhur dhe si një investim për stabilitetin e rajonit tonë”, u shpreh ministri i Jashtëm shqiptar.

Ai është pyetur edhe për debatet lidhur me emrin e Maqedonisë, mes Athinës dhe Shkupit, ku inkurajoi që të dyja palët të gjejnë zgjidhje për emrin.

“Ne i inkurajojmë të gjithë aktorët që të ecin përpara për zgjidhje. Të dy vendet do të përfitojnë nga zgjidhja me kompromis në këtë drejtim dhe mendoj të njëjtën gjë për të gjithë rajonin. Ne i kushtojmë një kujdes të veçantë kësaj çështjeje pasi atje ka shqiptarë që jetojnë”, u shpreh Bushati.