Kusari-Lila thotë se ndotja më e madhe ndodh brenda Parlamentit

Deputetët e Kuvendit kanë vazhduar debatin për gjendjen alarmante të ndotjes së ajrit në Prishtinë.

Megjithatë, as 50 deputetë nuk janë të pranishëm në sallë. Deputeti më i vjetër, Adem Mikullovci, ka thënë se çuditet se si po vazhdon seanca, kur nuk ka as kuorum, por kryesuesi Xhavit Haliti, tha se seanca mund të vazhdojë, por se, nuk mund të votohet asgjë, përcjell albinfo.ch.

Haliti ka justifikuar cilësinë e dobët të ajrit në Prishtinë. Sipas tij, asgjë nuk është jashtëzakonshme dhe nuk është situatë për t’u shqetësuar. Ai ka thënë se njëjtë ka qenë situata edhe gjatë viteve të 70-a apo 80-a.

Ndërsa, deputetja Mimoza Kusari-Lila, ka deklaruar se ndotja e ajrit në ambiente të jashtme nuk është problemi kryesor. Ajo theksoi se ndotja më e madhe ndodh brenda Parlamentit, ku sipas saj, konsumimi i duhanit është problem brenda ambienteve të këtij institucioni.

“Prishtina është njëra ndër qendrat më të ndotura, termocentralet, numri i madh i makinave, mosmatja e cilësisë së karburanteve, mospastrimi i rrugëve, janë disa nga shkaktarët për ndotjen e ajrit”, ka thënë ajo. Ndërkohë, deputeti i pavarur, Korab Sejdiu, e ka quajtur KEK-un qendër të krimit e korrupsionit e qendër të keqmenaxhimit, sipas tij, në kuptimin e plotë të fjalës.

Ganimete Musliu  nga PDK-ja ka thënë se asnjëherë nuk është bërë analiza sesa persona mund të kenë pësuar nga kjo ndotje.