Edhe mjekët nga Maqedonia drejt perëndimit

Arsyeja kryesore janë rrogat më të mëdha, kushtet më të mira për punë dhe jetë, si dhe avancim në profesion

Mjekët nga Kosova, Shqipëria, por edhe Maqedonia e Ballkani, po largohet drejt vendeve perëndimore evropiane për të punuar e jetuar.

Nga viti në vit po rritet numri i punëtorëve shëndetësorë të cilët e lëshojnë Maqedoninë dhe largohen për punë jashtë shtetit, transmeton “Zhurnal”.

Arsyeja kryesore janë rrogat më të mëdha, kushtet më të mira për punë dhe jetë, si dhe avancim në profesion, përcjell albinfo.ch.

Ky trend në shikim të parë shihet se është pozitiv, sepse vendet ekonomike të zhvilluara në Evropën Perëndimore ju ofrojnë kushte më të mira për kualifikimin e kuadrove shëndetësorë, por në anën tjetër sistemi shëndetësor më shumë po ballafaqohet me mungesë serioze të specialistëve.

Sipas të dhënave nga Oda e Mjekëve të Maqedonisë, vitin e kaluar 170 mjekë specialistë kanë marr vërtetim për punë jashtë shtetit, kurse në tre vitet e fundit janë larguar 513.

Nga viti 2013, deri tani, 810 mjekë specialistë kanë marr vërtetimin për punë jashtë shtetit. Në nivel vjetor, ky numër rritet në 140 deri 172 mjekë specialistë.