Gazeta serbe “Blic”: “Putin e ka gati njohjen e Kosovës”

E përditshmja e Beogradit “Blic” duke krahasuar kontributet e BE-së dhe Moskës, thekson se “Evropa në Serbi ka investuar shumë. Po të mos ishin investimet evropiane ky shtet do të kishte falimentuar prej vitesh”

E përditshmja serbe “Blic” ngreh alarmin në Beograd se presidenti i Rusisë, Vladimir Putin e ka gati njohjen e Kosovës, ndërsa raporton për ftohjen e raporteve ndërmjet Beogradit e Moskës. “Rusia gjithmonë Serbinë e ka shfrytëzuar si trampolinë të përshtatshme për realizimin e interesave të saj gjeopolitike. Serbinë më shumë e ka bërë shtet Evropa sesa Rusia”, shkruan sot “Blic”.

Se sa e mbrojti Rusia këtë shtet, thotë raporti, “u pa në vitin 1999 gjatë bombardimeve të NATO-së. Asnjë ushtar rus nuk vdiq për Serbinë”.

E përditshmja më e madhe e Beogradit, duke krahasuar kontributet e BE-së dhe Moskës, thekson se “Evropa në Serbi ka investuar shumë. Po të mos ishin investimet evropiane ky shtet do të kishte falimentuar prej vitesh. Vetëm 10 vitet e fundit, BE ka investuar mbi 5 miliardë euro. Evropa çdo ditë fabrika të reja, por edhe punëson serbë të shumtë”, shkruan “Blic”, citon KP.

“Unë nuk jam miku juaj, por as armiku juaj. Unë jam president i Rusisë“, përmend gazeta një thënie të Putinit.

Ndërkaq, historiani Srgjan Cvetkoviç,  thotë se në politikë zbatohen ligjet e interesit dhe se kush është më shumë mik apo armik.

“Është e vërtetë se është një vend sllav dhe ortodoks që është më afër nesh sesa disa demokracitë perëndimore. Por fuqitë e mëdha si Rusia, Kina, Shtetet e Bashkuara, Mbretëria e Bashkuar kanë provuar të udhëhiqen nga interesat e tyre.  Politika duhet të shihet si një tabelë shahu. Forcat e mëdha, për hir të përfitimit të mundshëm, shpesh sakrifikojnë ushtarët për të shpëtuar mbretëreshën”, thotë Cvetkoviç.

“Blic” shkruan se ka mësuar se për Krimenë apo çështje të tjera botërore, Rusia mund t’i bëjë një koncesion Amerikës për Kosovën.