Në ditëlindjen e 82-të, Thaçi uron Kadarenë me urimin që “sivjet ta fitojë Nobelin”

“Duke i uruar shëndet, nga Ismail Kadare presim edhe më tutje rrumbullakime të krijimtarisë së tij të nobelueshme”, thuhet në urimin e presidentit Hashim Thaçi

Shkrimtari më i madh shqiptar, Ismail Kadare sot shënon ditëlindjen e 82-të, ndërsa politikanët nga Kosova e Shqipëria i urojnë atij shëndet, me urimin që sivjet të merr edhe çmimin Nobel për letërsi, ndoshta i vetmi që se ka marr shkrimtari shqiptar që ka tejkaluar qëmoti kufijtë botëror. Kadare lindi në Gjirokastër më 1936, , ndërsa shquhet për novela, romane, publicistikë, kritike e poezi

Presidenti i Kosovës, Hashim Thaçi i ka uruar ditëlindjen e 82-të, shkrimtarit të shquar shqiptar, Ismail Kadare, duke thënë se ishte ai, që e ngriti letërsisë shqipe në përmasa të letërsisë së përbotshme. “Duke i uruar shëndet, nga Ismail Kadare presim edhe më tutje rrumbullakime të krijimtarisë së tij të nobelueshme”, thuhet në urim.

Shkrimtarin shqiptar e ka uruar edhe kryeministri Ramush Haradinaj.

Kadare në vitin 1958 mbaroi degën e Gjuhës e të Letërsisë në Universitetin e Tiranës, për të vazhduar më pas në Moskë me studime për dy vjet në Institutin e Letërsisë Botërore “Maksim Gorki” (1958-1960). Kadare sot konsiderohet njëri shkrimtarët më të mëdhenj të letërsisë botërore bashkëkohore.

Me veprën e tij, që ka shënuar një numër rekord të përkthimeve (në mbi 45 gjuhë të huaja) ai e ka bërë të njohur Shqipërinë në botë, me historinë dhe me kulturën e saj shekullore.

Vepra e parë e rëndësishme e Ismail Kadaresë në prozë është romani “Qyteti pa reklama”, që nuk u lejua të botohej i plotë deri në vitin 2003. Në vitin (1964) ai botoi kryeveprën “Gjenerali i ushtrisë së vdekur” e më vonë edhe romanin Kështjella (1975). Në romanin Kronikë në gur (1970) Kadare kritikoi psikologjinë provinciale dhe traditat prapanike.

Veprat tjera që e bëjnë të veçantë Kadarenë janë edhe “Prilli i thyer”, “Pallati i ëndrrave”, “Qorrfermani”, “…Lul Mazreku”… etj.

Ndryshe, Ismail Kadare është dekoruar nga Presidenti i Republikës së Shqipërisë me Urdhrin “Nderi i Kombit” dhe nga shteti francez me urdhrat “Kryqi i Legjionit të Nderit” e “Oficer i Legjionit të Nderit”.

Kadare më 2012 u nderua me Çmimin e madh spanjoll, “Princi i Asturias për Letërsi”, një nga çmimet me prestigjioze letrare në botë. Ai doli fitues mes 31 kandidateve nga 25 vende të ndryshme të botës ku dallohet emri i Milan Kunderas apo italiani Antonio Cabucchi. Shkrimtarit shqiptar i ka mbetur pa fituar vetëm edhe çmimin e Nobel, për të cilin disa herë ka qenë i nominuar.