Drejtori i AKI-së thotë se veriu s’rrezikohet nga trazirat

Drejtori i Agjencisë së Kosovës për Inteligjencë, Driton Gashi, ka raportuar për gjendjen e sigurisë në veri të vendit pas vrasjes së Oliver Ivanoviqit në Komisionin parlamentar që mbikëqyr këtë institucion.

Kryetarja e komisionit për AKI, Donika Kadaj-Bujupi, pas mbledhjes ka thënë se nga informacionet që kanë marrë nga Gashi gjendja e sigurisë në veri vlerësohet si e qetë dhe stabile, përcjell albinfo.ch.

Kadaj theksoi se kanë kërkuar përgjegjësi nga AKI-ja dhe të njëjtën gjë do ta bëjnë edhe me Policinë, nëse vrasja e Ivanoviqit mund të parandalohej pasi sipas saj, AKI-ja ishte në dijeni se mund kishte sulme dhe trazira.

Por, Kadaj ka shtuar se në bazë të gjendjes në terren përjashtohet mundësia e trazirave. “Do të kërkojmë informacione edhe nga policia a ka pasur neglizhencë dhe a ka pasur mundësi të parandalohej rasti”, ka thënë Kadaj. Ajo më tej shtoi se kanë kërkuar shpërbërjen e bandave në veri, në mënyrë që rendi dhe ligji të shtrihen edhe në këtë pjesë të vendit. Po ashtu, tha se AKI-ja ka informacione për vrasjen e Oliver Ivanoviqit dhe se është duke i shqyrtuar ato në mënyrë që të zbardhet kjo vrasje.