18 vjet pas luftës, ende probleme me energji elektrike

Keystone (AP Photo/Visar Kryeziu)

Më 17 shkurt bëhen 10 vjet nga shpallja e Pavarësisë së Kosovë, e në verë 19 vjet nga përfundimi i luftës, derisa ende vazhdojnë problemet me energji elektrike.

Reduktimet bëhen edhe më të shpeshta sidomos gjatë stinës së dimrit. Shumë familje kosovare, alternativë të vetme për ngrohje kanë rrymën nga e cila varet edhe furnizimi me ujë e ngjitja në kate të larta.

Mungesë të furnizimit me rrymë po vërehet edhe në Prishtinë. Shumë lagje të kryeqytetit si ajo “Mati 1”, mbetën për orë të tëra pa furnizim me energji elektrike. Qytetarët ankohen për këtë situatë e zyrtarët e KEK-ut e KEDS-it japin arsyetimet e tyre, raporton RTK, përcjell albinfo.ch.

Një pjesë e Prishtinës të hënën mbeti pa rrymë për më shumë se 12 orë. KEDS-i deklaron se kjo gjë ka ndodhur për shkak të disa prishjeve. Përmes adresës elektronike KEDS njofton se të hënën, rreth orës 13:30 ka ndodhur prishje në një trafo private në lagjen MATI 1 të Prishtinës.

Sipas KEDS-it, prishja ka ndodhur nga mbingarkesa e këtyre trafove si pasojë e ngrohjes me energji elektrike.

E zyrtarë nga KEK-u thonë se ky institucion është duke përmbushur në tërësi obligimet kontraktuale që ka ndaj KEDS-it dhe KESCO-s, dhe është duke respektuar rregullat e tregut në fuqi.

Kryeministri i Kosovës, Ramush Haradinaj, të hënën, gjatë një vizite në Obiliq, tha se nga prodhimi i energjisë në KEK, plotësohen 86% e nevojave për rrymë në vend, duke bërë që sipas tij, gjendja të konsiderohet e qëndrueshme.