Ligji për Specialen dërgohet në Qeveri

Kryesia e Kuvendit ka marrë vendim që nisma për shfuqizimin e Ligjit për Dhomat e Specializuar të dërgohet në Qeveri, ndërsa peticioni i Organizatave të dala nga Lufta për shfuqizimin e Speciales kryesia e ka proceduar për tek Komisioni për të Drejtat e Njeriut, Barazi Gjinore, për Persona të Pagjetur dhe Peticione.

Kryetari i Kuvendit të Kosovës, Kadri Veseli, ka thënë se kryesia ka vepruar në bazë të rregullores, duke shtuar se qëndrimet politike për këtë çështje tashmë dihen, përcjell albinfo.ch.

Sipas tij, largimi nga mbledhja i LDK-së ka qenë i panevojshëm. Deputeti i VV-së, Glauk Konjufa, ka deklaruar duhet pyetur Xhavit Halitin pse u vendos kështu dhe pse kjo iniciativë nuk është në Kuvend, por shkoi në Qeveri.

E, Memli Krasniqi nga PDK-ja, pas vendimit të Kryesisë ka thënë se tashmë gjithçka ka marrë rrugën procedurale ligjore. Ai ka shtuar se nuk ka krizë në raport me ndërkombëtarët.

Kryetari i GP të LDK-së, Avdullah Hoti, ka braktisur mbledhjen e Kryesisë së Kuvendit kur filloi diskutimi për shfuqizimin e Gjykatës Speciale. Ai ka ritheksuar se kjo çështje është e dëmshme dhe rrezikon marrëdhëniet me ndërkombëtarët.

“Qëndrimi ynë për Specialen dihet. LDK është kundër shfuqizimit”, ka deklaruar Hoti. Ndryshe seanca e radhës së Kuvendit do të mbahet më 25 janar.