Festivali i dramës shqipe “Talia e Flakës” sjell gjashtë shfaqje në Gjilan

Teatro nga të gjitha trevat shqiptare do të marrin pjesë në festivalin  e dramës shqipe “Talia e Flakës”, i cili ndër vite ka mbledhur më së shumti shikues në manifestimin “Flaka e Janarit”, e që mbahet në qytetin e Gjilanit.

Bashkim Nexhipi, koordinator i “Flakës së Janarit 2018”, ka thënë se kështu, në natën e parë, më 22 janar, që është edhe mbrëmje hapëse, të parët do të paraqiten vendësit, Teatri i Gjilanit, i cili do të japë shfaqjen “Një natë në hotel”, me tekst të Muharrem Shahiqit, me dramatizim të Agush Mulliqit e në regji të Bashkim Ramadanit, përcjell albinfo.ch.

Në mbrëmjen e dytë do të jepet shfaqja “Kosovatrans” e teatrit “Agush Ramadani” të Podujevës, me tekst e regji të Naser Shatrollit. Teatri Shqiptar i Shkupit, në mbrëmjen e tretë të festivalit do të japë shfaqjen “G”, të autorit Gjergj Fishta, me dramatizim dhe regji të Sulejman Rushitit.

Regjisori Milto Kutali, i cili më herët kishte realizuar shfaqje edhe në Gjilan, kësaj radhe do të sjellë shfaqjen nga Shqipëria “Rrno për me tregue”, të cilën e pati shkruar At Zef Pllumbi. Teatri nga Prishtina “Dodona” do të paraqitet me shfaqjen “Portreti i pakryer”, të autorit Besim Rexhaj, e regjinë e së cilës e ka bërë Elmaze Nura. Festivalin do ta përmbyllë shfaqja “Në dorë të fatit…” e teatrit “Petro Marko” nga Vlora.