Ja pse Shqipëria nuk arrin rritje ekonomike 5% në një vit

FMN kishte llogaritur një rritje në masën 4.1 për qind gjatë vitit të ardhshëm, por gjashtë muaj më pas ka ndryshuar mendim, duke vlerësuar në ulje, në nivelin sërish të 3.7 përqindve

Prodhimi i Brendshëm Bruto do të jetë më i ulët se sa parashikimi, ndërkohë që bilanci i llogarisë korrente në Shqipëri do të mbetet gjithnjë në terren negativ. Janë këto parashikimet kryesore për periudhën 2017-2019, që zbulohen në raportin e ekonomisë botërore të Fondit Monetar Ndërkombëtar, të publikuar në Uashington,

Ekspertët e FMN, nisur edhe nga situata që panë vetë në Tiranë gjatë misionit të tyre të fundit, të sapopërfunduar, kanë lënë në fuqi parashikimin e rritjes ekonomike për këtë vit, në 3.7 për qind, ndërkohë që kanë ulur mjaft parashikimin për këtë tregues gjatë vitit të ardhëm, shkruan albinfo.ch.

FMN kishte llogaritur një rritje në masën 4.1 për qind gjatë vitit të ardhshëm, por gjashtë muaj më pas ka ndryshuar mendim, duke vlerësuar në ulje, në nivelin sërish të 3.7 përqindëve.

Deklaratat e fundit të qeverisë shqiptare bie në kundërshtim, sepse sipas drejtuesve kryesorë në këtë vit pritej një rritje në masën 4 për qind, për të kaluar më pas deri në 5 për qind. Në fakt, misioni i FMN në përfundim të vizitës së fundit në Tiranë njofti se pritet një ngadalësim i ritmeve të ekonomisë shqiptare, si pasojë e afrimit të fundit të realizimit të objekteve të mëdha investuese, të tilla si gazsjellësi Transadriatik apo hidrocentrali i Moglicës, të cilët kanë filluar disa vite më parë.