250 viktima të tregtisë me qenie njerëzore në vit

Në këtë tregti përfshihet detyrimi i grave, burrave dhe fëmijëve që të merren me prostitucion, me kërkim lëmoshe ose edhe për të punuar si fuqi e lirë punëtore, me paga minimale

Në Zvicër për çdo vit zbulohen nga së paku 250 viktima të tregtisë me qenie njerëzore. Por, siç shkruan Departamenti për Drejtësi dhe (EJPD) në një komunikatë të lëshuar sot, “shifra e errët” duhet të jetë shumë më e madhe.

Në këtë tregti përfshihet detyrimi i grave, burrave dhe fëmijëve që të merren me prostitucion, me kërkim lëmoshe ose edhe për të punuar si fuqi e lirë punëtore, me paga minimale. Kjo e fundit shprehet më shpesh në ndërtimtari, në hoteleri por edhe në përkujdesje private dhe në bujqësi.

Me rastin e Ditës Evropiane kundër Tregtisë me Qenie Njerëzore, sot, më 18 tetor, EJPD e ka nisur një autobus informativ për të bërë një turne njëvejeçare në gjithë Zvicrën.

Viktimave të tregtisë me qenie njerëzore shpesh nuk u shihet dhembja në pamje të parë. “Një fytyrë jo gjithmonë të zbulon se nëpër çfarë vuajtjesh ka kaluar një njeri. Mbrapa saj fshihet ndoshta një grua e shfrytëzuar seksualisht e cila është e detyruar të durojë dhunën ose një burrë të cilit i është premtuar punë me pagesë normale dhe i cili pastaj detyrohet të punojë me pagesë robi”, shkruan në komunikatën e EJPD-së.

Në autobusin informativ, vizitorët i presin raportime nga përjetimet e viktimave, fotografi, numra dhe sqarime lidhur me temën.

Krahas aksionit në nivel qendror, me autobus, sot, e mërkurë, kanë filluar edhe javët zvicerane të aksionit kundër tregtisë me njerëz, të cilat vazhdojnë deri më 3 nëntor. Gjatë kësaj kohe do të ketë aktivitete në një numër kantonesh, ku do të shfaqen filma dokumentarë ose do të hapen ekspozita.

Autobusi informativ është lansuar nga Byroja Zvicerane e Organizatës Ndërkombëtare për Migracion (IOM) dhe Fondacioni “Fondation neuchâteloise pour la coordination de l‘action sociale (FAS)”. Këto të dyja mbështeten edhe nga Zyra Federale e Policisë (Fedpol), Sekretariati Shtetëror për Migracion (SEM) dhe Ministria e Punëve të Jashtme (EDA).