Amerika do të pranojë më së paku refugjatë në historinë e saj

Në SHBA do të lejohen të hyjnë vetëm 45 mijë persona, 19 mijë nga Afrika, 5.000 nga Azia Lindore, 2.000 nga Evropa dhe Azia Qendrore, 1.500 nga Amerika Latine dhe Karaibet, si dhe 17.500 nga Lindja e Mesme e Azia Jugore

Vitin e ardhshëm, Shtetet e Bashkuara të Amerikës do të pranojnë më së paku refugjatë. Administrata amerikane do t’u lejojnë hyrjen në SHBA vetëm 45 mijë personave, shifra më e ulët e regjistruar ndonjëherë që nga hyrja në fuqi e ligjit mbi pranimin e refugjatëve, 37 vite më parë.

Qeveria i paraqiti një propozim Kongresit, ku parashikohet që vitin e ardhshëm fiskal në SHBA të pranohen më pak të huaj, saktësisht 19 mijë nga Afrika, 5.000 nga Azia Lindore, 2.000 nga Evropa dhe Azia Qendrore, 1.500 nga Amerika Latine dhe Karaibet, si dhe 17.500 nga Lindja e Mesme e Azia Jugore. Viti fiskal 2018 nis nga tetori 2017 deri në shtator 2018, raporton “TCH”.

Gjatë kohës kur në krye të Shtëpisë së Bardhë ishte Barack Obama, kufiri i refugjatëve të pranuar ishte 110 mijë, përcjell albinfo.ch.

Në vendet e zhvilluara perëndimore, vendi që ka pranuar më shumë refugjatë është Gjermania, me pothuajse 700 mijë të tillë të regjistruar në vitin 2016.