Qeveritë shqiptare s’po përkrahin hulumtimet shkencore

Punimet e Takimit të dymbëdhjetë Ndërkombëtar të Institutit të studiuesve shqiptarë Alb-Shkenca do të zgjasin tri ditë

Ka nisur konferenca shkencore e Institutit të studiuesve shqiptarë ‘ALB-Shkenca” që është  viti i 12 me radhë në të cilin mblidhen studiues nga Kosova, Shqipëria, Maqedonia por edhe studiues nga vende të ndryshme, që t’i shkëmbejnë njohuritë e tyre mbi krijimet shkencore, transmeton albinfo.ch.

Drejtori i Përgjithshëm i “ALB-Shkenca”, Gentian Zymberi ka thënë se qeveritë shqiptare nuk po japin mjaftueshëm përkrahje institucionale në këtë drejtim. Ai ka kërkuar fonde më të mëdha.

Ndërsa Ministri i Arsimit, Arsim Bajrami ka thënë se buxheti që ndahet për kërkimet shkencore nuk është i mjaftueshëm por që ka thënë se studiuesit duhet të kërkojnë mënyra të tjera se si të depërtojnë si ajo e Erasmus Plus. Bajrami ka thënë se kanë vështirësi në moscaktimin e prioriteteve dhe kërkoi po ashtu rritje të fondeve.

“Ne duhet të mos kufizohemi vetëm në qeveritë tona, të cilat asnjëherë nuk kanë buxhet të mjaftueshëm, por duhet të gjejmë edhe rrugë për të depërtuar në fondet ndërkombëtare”, tha ministri Bajrami, ndërsa theksoi se është një lajm i mirë që Kosova këtë vit është pranuar në programin Erasmus+.

Punimet e Takimit të dymbëdhjetë Ndërkombëtar të Institutit të studiuesve shqiptarë Alb-Shkenca do të zgjasin tri ditë.