FMN-ja ndërpret programin “Stand By” me Kosovën

Me ndërprerjen e programin “Stand By” Kosova rrezikon të mos  i marrë rreth 16 milionë euro, meqë programi përfundon më 4 gusht dhe në mungesë të rishikimit të buxheti këto mjete nuk mund të arkëtohen.

Problematika pensioneve të veteranëve të luftës sërish përballë Qeverinë e Kosovës me Fondin Monetar Ndërkombëtar (FMN). Sipas një informacioni që të enjten e sjell gazeta e Prishtinës  “Koha Ditore”, FMN-ja e ka ndërprerë programin “Stand By” me Kosovën për shkak se Qeveria në Prishtinë nuk i ka përfillur vërejtjet lidhur me amendamentin e Ligjit dhe kategorizimin e veteranëve të luftës së UÇK-së.

Siç raporton më tej “Koha Ditore” kjo çështje është diskutuar të mërkurën në Prishtinë mes përfaqësuesve të FMN-së dhe të Qeverisë së Kosovës.

Me ndërprerjen e programin “Stand By” Kosova rrezikon të mos  i marrë rreth 16 milionë euro, meqë programi përfundon më 4 gusht dhe në mungesë të rishikimit të buxheti këto mjete nuk mund të arkëtohen. Kosova po ashtu ka humbur edhe rreth 25 milionë euro të Bashkimit Evropian, që ndërlidhen me vlerësimet e FMN-së.

Rishikimi i katërt buxhetor nuk ka ndodhur për shkak të situatës politike, pasi që vendi shkoi në zgjedhje të jashtëzakonshme  jashtë afatit të rregullt kushtetues, dhe kjo do të ketë pasoja për shumë agjenci buxhetore.

Amendamentet për ndryshimin e Ligjit për Veteranëve të Luftës të harmonizuara mes përfaqësuesve të veteranëve të luftës dhe zyrtarëve ligjorë të Ministrisë së Punës dhe Mirëqenies Sociale, ishin sjell në Kuvendin e Kosovës gjatë muajve të pranverës, por ato nuk u miratuan për shkak të kundërshtimeve të mëdha të opozitës.