Nëntogeri i FSK-së shpërblehet në Amerikë

Nëntogeri i FSK-së, Genti Koqinaj mori çmimin “Col. Alan C. Dexter”, çmim ky i cili i jepet studentit ndërkombëtar më të mirë të klasës, që tregon performancë të jashtëzakonshme akademike dhe udhëheqëse

Genti Koqinaj, nëntoger i Forcës së Sigurisë të Kosovë (FSK) ka diplomuar në “Kursin Bazik të Oficerëve për Komunikim” në SHBA, ku si shpërblim për rezultatet e treguara gjatë këtij trajnimi, nga shefi i Shtabit të “Cyber Center of Excellence” në bazën Fort Gordon mori çmimin “Col. Alan C. Dexter”, çmim ky i cili i jepet studentit ndërkombëtar më të mirë të klasës, që tregon performancë të jashtëzakonshme akademike dhe udhëheqëse, raporton Ministria për Forcën dhe Sigurinë e Kosovës, përcjell albinfo.ch.

Ai e ka kryer kursin 22 shkurti deri më 21 qershor, në Shkollën e Sinjaleve të Ushtrisë Amerikane, në Fort Gordon, Georgia, ku pjesëmarrës kanë qenë 53 kadetë nga shtete të ndryshme të botës, si nga Amerika, Kosova, Hungaria, Arabia Saudite dhe Bosnja e Hercegovina.

Gjatë zhvillimit të këtij trajnimi pjesëmarrësit kanë marrë pjesë rregullisht në ushtrime fizike si dhe janë sprovuar me role dhe pozita të ndryshme, duke përfshirë këtu; S1, S2, S3, S4, S6, komandant togu, udhëheqës skuadre apo udhëheqës ekipi. Pas rezultatit të treguar nëntoger Koqinaj është caktuar dy herë në pozitën e komandantit të togut, pozitë kjo e cila zakonisht është e rezervuar vetëm për oficerë amerikanë dhe jo ndërkombëtar.

Nëntoger Koqinaj gjatë kësaj periudhe ka arritur që krahas këtij kursi të ndjek edhe trajnimin shtesë për Mbrojtje të Afërt Luftarake, ku është certifikuar për nivelin e parë të këtij programi.