Goditja e murit me grusht, nuk është aksident

Personi që e ka bërë këtë veprim, ka marrë në konsideratë edhe dëmin që do ta pësojë, në këtë rast, lëndimin

Nëse një person, duke shfryrë mllefin e tij e godet murin me grusht dhe pëson lëndime nga kjo, nuk bëhet fjalë për aksident. Me fjalë tjera, ai nuk mund të pretendojë që sigurimi për aksidente t`ia kompensojë trajtimin mjekësor të dorës së lënduar.

Këtë përfundim e ka marrë Gjykata Federale e Zvicrës, duke iu referuar një rasti të tillë që ka ndodhur në vitin 2014.

Në rastin e goditjes me grusht në mur kemi të bëjmë me një veprim që në gjuhën juridike quhet “eventualdolus”, që nënkupton se është bërë me qëllim dhe jo në mënyrë aksidentale, shkruan albinfo.ch. Pra, personi që e ka bërë këtë veprim, ka marrë në konsideratë edhe dëmin që do ta pësojë, në këtë rast, lëndimin.

Për këtë arsye këtu nuk kemi të bëjmë me aksident. Së këndejmi, shkalla më e lartë e gjyqësisë së Zvicrës ka marrë vendimin e përmendur, sipas të cilit kurimin e dorës së personit të lënduar e paguan sigurimi shëndetësor dhe jo ai për aksidente.