Qeveria, kundër rregullimit në nivel federal të simboleve fetare

Konfliktet eventuale duhet të zgjidhen në mënyrë pragmatike, në nivelet ku ato janë shkaktuar, në komuna ose në kantone

Këshilli Federal i Zvicrës ka vendosur që problemet me simbolet religjioze në hapësirat e ndërtesave publike si për shembull në klasat e shkollave, të mos rregullohen me ligje në nivel federal. Fjala është kryesisht për simbolet si “Crucifix” (Krishti i kryqëzuar) etj.

Institucionet në fjalë duhet që konfliktet eventuale t`i zgjidhin në mënyrë pragmatike, në nivelet ku ato janë shkaktuar, në komuna ose në kantone. Në këtë mënyrë, sipas ekzekutivit të vendit, do të arriheshin rezultate më të mira se sa përmes vendosjes së rregullave të ngurta, shkruan Këshilli Federal në një raport të tij.

Qasja federale lidhur me të drejtën e besimit në Zvicër është ngulitur thellë dhe e ka dëshmuar veten, thuhet në raport. Veç kësaj, sipas Këshillit Federal, rruga juridike për zgjidhjen e konflikteve mbi këtë bazë merret fare rrallë.