Parlamenti Zviceran, masa për pengimin e shopingut jashtë vendit

Sipas mocionit, në të ardhmen duhet paguar tatim në vlerën e shtuar për Zvicrën nga vlera prej 50 frangash e mallrave të blera, e jo nga 300 sa është tash

“Turizmi” i zviceranëve për të bërë “shoping”, gjegjësisht për furnizim me çmime më të lira në vendet në kufi, përbën prej kohësh shqetësim për autoritetet e vendit. Kjo, për faktin se ky turizëm dëmton shitoret zvicerane, sidomos ato në zonat afër kufirit. Për t`i dhënë një rrugë zgjidhjeje këtij problemi, Dhoma e Kantoneve në Parlamentin e Zvicrës ka vendosur sot që ai të vihet nën llupë, shkruan srf.ch.

Kështu, sot deputetët kanë miratuar me heshtje një mocion për rishikim të kësaj problematike, të cilin e ka përcjellë më tutje për rishikim te komisioni përkatës.

Autor i mocionit ka qenë deputeti Werner Hösli nga SVP. Ai ka kërkuar që turistët e shopingut të detyrohen për t`i paguar më tepër shtetit për blerjet që i bëjnë jashtë vendit, transmeton albinfo.ch. Ata, sipas mocionit, duhet në të ardhmen të paguajnë tatim në vlerën e shtuar për Zvicrën nga vlera prej 50 frangash e mallrave të blera, e jo nga 300 sa është tash.

Komisioni duhet të shqyrtojë nëse kjo masë ose masa të tjera do të pengojnë dëmet që shkakton blerja jashtë vendit. Ndërkaq Këshilli Federal është deklaruar kundër përshtatjes së pragut të mallrave të lejuara për blerje jashtë pa iu nënshtruar pagesës së tatimit të vlerës së shtuar në Zvicër.