U nënshkrua Marrëveshja për Sigurimet Sociale Zvicër-Kosovë

Sot në Bernë, delegacionet teknike të Kosovës dhe Zvicrës miratuan tekstin final te marrëveshjen bilaterale për sigurime sociale, thuhet në një komunikatë të Ministrisë për punë dhe çështje Sociale të Kosovës

Siç ka paralajmëruar dje albinfo.ch, marrëveshja “për pensionet” në mes të Kosovës dhe Zvicrës është nënshkruar sot. “Delegacionet teknike të Kosovës dhe Zvicrës përfunduan negociatat dhe miratuan tekstin final te marrëveshjen bilaterale për sigurime sociale” thuhet në një komunikatë të Ministrisë për punë dhe çështje Sociale të Kosovës.

“Grupet teknike harmonizuan marrëveshjen e përgjithshme, marrëveshjen administrative si dhe formularët e nevojshëm qe do të nevojiten për implementimin e kësaj marrëveshjeje”, thuhet më tutje.

Me miratimin e sotëm te marrëveshjes i hapet rruga kësaj marrëveshje qe te kalojë procedurat tjera nëpër shtetet respektive deri në aprovimin final dhe fillimin e implementimit te saj.

Ministria e Punës dhe Mirëqenies Sociale do të vazhdojë me ritëm të njëjtë te punojë që kjo marrëveshje sa më shpejtë të kalojë procedurat e nevojshme në Kosovë dhe te ratifikohet një ditë e më parë.

Për dy vite punë arritëm të kthejmë besimin në Institucionet e Kosovës dhe t’i ofrojmë zgjidhje një problemi mbi 5 vjeçar duke nënshkruar marrëveshjen e parë bilaterale në fushën e sigurimeve sociale për Republikën e Kosovës dhe më e rëndësishmja t`i ofrojmë një mundësi mijëra bashkatdhetarëve tanë që kanë kontribuar në vazhdimësi në ndërtimin e Kosovës”, thuhet në fund të komunikatës.

Ministri i punës dhe i çështjeve sociale në Qeverinë e Republikës së Kosovës, Arban Abrashi, një intervistë ekskluzive të dhënë një ditë më parë për albinfo.ch ka njoftuar lidhur me nënshkrimin e pritshëm të kësaj marrëveshjeje.

Siç dihet, nga 1 prilli i vitit 2010, qytetarët e Kosovës që kanë punuar në Zvicër dhe kanë vendosur të jetojnë në Kosovë, nuk kanë pasur të drejtë t`i marrin atje pensionet e tyre zvicerane. Një përpjekje tashmë 7 vjeçare e aktivistëve shqiptarë të sindikatës zvicerane Unia dhe e kolegëve të tyre zviceranë është kurorëzuar me sukses, pasi që ka arritur të sensibilizojë edhe Qeverinë e Kosovës për të shtyrë çështjen përpara.