Njohja e “njërës gjuhë të vendit” nuk mjafton, kusht për pasaportë është gjermanishtja!

Qeveria kishte kërkuar që ky kriter të zbutej. Propozimi i saj ishte që, njohja e mirë e njërës nga gjuhët e vendit, bashkë me njohjen elementare të gjermanishtes duhet të mjaftojnë për natyralizimin e të huajve në kanton

Personat me shtetësi të huaj të cilët duan të marrin shtetësinë zvicerane në Kantonin Nidwalden, duhet të njohin gjuhën gjermane në nivel të duhur që mundëson kuptimin me të tjerët, njofton sda.ch E veçanta e këtij vendimi që ka marrë sot Parlamenti i këtij kantoni është se nuk mjafton vetëm njohja e mirë e “njërës nga gjuhët vendore”, siç parashihet në nivel vendi dhe në kantonet tjera.

Qeveria kishte kërkuar që ky kriter të zbutej, transmeton albinfo.ch. Propozimi i saj ishte që, njohja e mirë e njërës nga gjuhët e vendit, bashkë me njohjen elementare të gjermanishtes duhet të mjaftojnë për natyralizimin e të huajve në kanton.

Sigurisht, parlamentarët nuk e pranuan kompromisin. Për më tepër, me shumicë votash në parlament u vendos që edhe më tutje të jenë asambletë e qytetarëve ato që do të vendosin për natyralizimin. Nga ana tjetër, komisionet përgatitëse kishin kërkuar që këto asamble të mund të delegojnë natyralizimin në asambletë (kuvendet) komunale.

Asambleja e qytetarëve është një institucion relikt i demokracisë së drejtpërdrejtë, autentike, zvicerane, shkruan albinfo.ch. Në të votojnë të gjithë qytetarët me të drejtë vote, të mbledhur në një shesh të fshatit a qytetit, ose edhe në sallë. Pra bëhet fjalë për qytetarë të thjeshtë dhe jo të zgjedhur apo deleguar. Ky institucion vazhdon të ekzistojë kryesisht  në regjione të izoluara, malore të Zvicrës.