Zvicra është e pastër!

Qoftë në Liqenin e Cyrihut, në Pfäffikon apo në liqenin e Luzernit, kudo ju mund të gëzoni cilësi të shkëlqyer të ujit dhe mund të shkoni për të notuar. Një rezultat i ngjashëm u gjet edhe në Ticino dhe në Liqenin e Gjenevës dhe atë të Neuchâtel-it.

Vetëm një stacion larjesh në Lausanne dhe dy në Rinë pranë Kaiseraugst AG u vlerësuan të “dobëta” për cilësinë e ujit. Por, këto janë vetëm raste të izoluara, ngase nga gjithsej 231 vende, vetëm tri kishin një cilësi të mangët të ujit.

Zvicra zë një pozicion të lartë në krahasim me Evropën, në vendet e tjera është përmirësuar pastërtia e ujërave të larjes, transmeton albinfo.ch.

Sipas komisarit të BE-së, Karmenu Vella, “ky është rezultat i investimeve 40-vjeçare në infrastrukturën e ujërave dhe kanalizimeve”. Në vitin 1991, vetëm 51 për qind e të gjitha ujërave u gjetën të mira, 96 për qind kanë një cilësi të pranueshme të ujit dhe 84 për qind kanë cilësi të shkëlqyeshme të ujit.