62 fëmijë mbahen të rrëmbyer jashtë vendit

Ky numër është dukshëm më i madhi deri tash. Në vitin 2015 qenë bërë 51 kërkesa ndërsa në vitin 2006, kishin qenë 42 raste të tilla

Gjatë vitit 2016 ka ndodhur 62 herë që nënat ose baballarët i janë drejtuar Zyrës Federale të Drejtësisë (BJ) për t`i kërkuar ndihmë që t`i kthejnë në Zvicër fëmijët e tyre të rrëmbyer. Në dhjetë raste tjera bëhet fjalë për të drejtën e vizitës.

Siç shkruajnë gazetat “Zentralschweiz am Sonntag” dhe “Ostschweiz am Sonntag” ky numër është dukshëm më i madhi deri tash. Në vitin 2015 qenë bërë 51 kërkesa ndërsa në vitin 2006, kishin qenë 42 raste të tilla, transmeton albinfo.ch. Por, kjo statistikë përfshin vetëm rastet në lidhje me 100 shtetet, kryesisht perëndimore, nënshkruese të Marrëveshjes së Hagës mbi rrëmbimin e fëmijëve.

Mosha mesatare e fëmijëve që konsiderohen të rrëmbyer ka qenë 7 vjet. Në 75 për qind të rasteve ka qenë nëna ajo që ka marrë fëmijën. Ndërsa në 90 për qind të rasteve sërish kanë qenë nënat që kanë hedhur poshtë kërkesat e baballarëve për vizitë të fëmijës së tyre të përbashkët, në raste ndarjesh.

Nga ana tjetër, autoritetet e shteteve tjera gjatë vitit 2016 i kanë bërë Zvicrës 29 kërkesa për kthim të fëmijëve ndërsa në tri vitet e mëparshme janë regjistruar nga 35 kërkesa të tilla, përcjell albinfo.ch. Krahas kërkesave për kthim, gjatë vitit të kaluar ka pasur edhe 14 kërkesa për vizitë.