Zvicra ka ndaluar në kufijtë e saj, më shumë se 9400 të huaj të mitur

Më shumë se gjysma e të miturve ishin mes moshës 17 dhe 18 vjeç. Këshilli Federal thekson se në shumicën e rasteve informacionet janë bazuar në të dhënat e ofruara nga refugjatët, por jo edhe në dokumente

(KEYSTONE/Martin Ruetschi)

Sipas autoriteteve kufitare “Grenzwacht korps”, 9416 persona të moshës 12 deri 18 vjeç u ndalën në kufirin zviceran vitin e kaluar. Kjo është përgjigjja e Këshillit Federal në një interpelancë, përcjell albinfo.ch.

Më shumë se gjysma e të miturve ishin mes moshës 17 dhe 18 vjeç. Këshilli Federal thekson se në shumicën e rasteve informacionet janë bazuar në të dhënat e ofruara nga refugjatët, por jo edhe në dokumente.

Nga të dhënat e autoriteteve kufitare nuk tregohet nëse të miturit ishin të shoqëruar nga të rritur apo ishin të vetëm.

Sekretariati Shtetëror për Migrim (SEM) tha se gjysma e të miturve kanë paraqitur një kërkesë për azil në kufi dhe iu dorëzuan Sekretariatit Shtetëror për Migrim (SEM) për procedime të mëtutjeshme. Gjysma tjetër iu dorëzua autoriteteve të huaja.

Si një arsye, Këshilli Federal thotë se ata ose nuk i kanë plotësuar kërkesat ligjore për hyrjen në Zvicër, ose vetëm kanë dashur të kalojnë tranzit Zvicrën pa kërkuar azil.