Rrugët do të ngarkohen para festave të Pashkëve

Datat e pushimeve përkojnë në disa vende evropiane. Pritet tashmë të shohim kolona të gjata të makinave në pjesën veriore të tunelit Gotthard gjatë fundjavës para Pashkëve. SBB/CFF do të vëjë në dispozicion 46.000 vende shtesë gjatë ditëve kritike.

Shumë pushues kanë dëshirë të shkojnë në jug në këtë kohë të vitit. Ata që kanë mundësinë të marrin rrugën para të enjtes, do të jenë të privilegjuar, pa dyshim. Por, megjithatë, atyre do t’u duhet të presin rreth një orë, thotë Zyra Federale e Rrugëve (ASTRA) në një deklaratë.
Udhëtarët që duan të kalojnë të enjten në Gotthard, ‘ditën e së enjtës së shenjtë’ dhe të nesërmen do të bllokohen të paktën për dy orë ose më shumë. Është gjithashtu e mundur që pritjet të vazhdojnë gjatë gjithë natës, paralajmëron FEDRO/OFROU. Situata pritet të normalizohet vetëm të premten në mbrëmje.

Alpet dhe Italia, shumë të prekura

Rrugët e ndryshme kryesore në Oberlandin e Bernës, të kantoneve Graubunden dhe Valais, do të jenë gjithashtu shumë të prekura nga qarkullimi i madh gjatë kësaj periudhe. Udhëtarët do të presin shumë në rrugët doganore Au, Koblenz, St. Margrethen dhe Thayngen, bën me dije FEDRO/OFROU.

SBB/CFF ka planifikuar përforcime të linjave që shkojnë në jug gjatë fundjavës së Pashkëve. Trenat e rregullt do të jenë të pajisur me makina të tjera, ndërsa 28 trena të tjerë do të vihen në qarkullim.

Vala më e lartë e kthimeve pritet të ndodhë të hënën e Pashkëve dhe gjatë fundjavës në vijim. Është e rekomanduar që udhëtarët në drejtim të veriut të nisen para mesditës.