Rrëshqet dheu në magjistrale, izolohet nga bota fshati Bristen

Bëhet fjalë për rreth 100 metra rruge të shkatërruar dhe për pasojë në fshatin Bristen që ka rreth 500 banorë, tashmë mund të shkohet vetëm këmbë

Mbrëmjen e të dielës ka rrëshqitur dheu në rrugën regjionale në mes të lokaliteteve Amsteg dhe Bristen në Kantonin Uri. Bëhet fjalë për rreth 100 metra rruge të shkatërruar dhe për pasojë në fshatin Bristen që ka rreth 500 banorë, tashmë mund të shkohet vetëm këmbë. Izolimin e fshatit e ka konfirmuar për mediat zvicerane  edhe kryetari i komunës Silenen, Hermann Epp në të cilën bën pjesë Bristeni.

Ndërkohë, drejtoria e ndërtimit e Kantonit Uri dhe komuna Silenen janë duke punuar në një lidhje emergjente.

Shkaku i rrëshqitjes së dheut është duke u hetuar nga gjeologët dhe inxhinierët ndërsa ende nuk mund të thuhet se sa do të zgjasë bllokimi i rrugës. Por me siguri nuk ka mundësi që izolimi të shpërthehet brenda ditës së sotme.

Autoritetet janë duke e përpunuar një plan të emergjncës. “Puna më e rëndësishme është sigurimi i furnizimit. Në rast se bllokimi do të vazhdojë më gjatë, ne do të detyrohemi që ushqimet në fshat t`i dërgojmë me helikopter”, ka thënë kretari i komunës.