775 mijë zviceranë jetojnë jashtë vendit: 2.9% më shumë se një vit më parë

Më së shumti shtetas të Zvicrës, sipas ministrisë jetojnë në Francë. Në vitin 2016 numri i tyre për herë të parë ka kaluar mbi 200 mijë. Pas Francës vjen Gjermania, ku jetojnë 90 mijë zviceranë

Sërish ka shënuar rritje numri i zviceranëve që jetojnë jashtë vendit. Kështu, në përfaqësitë e Zvicrës në botë, vitin e kaluar, 2016 kanë qenë të regjistruar 774.923 mijë zviceranë që jetojnë jashtë Zvicrës. Dhe, ky numër është për 2.9 për qind më i madh se ai i shënuar një vit më parë, bën të ditur Departamenti (Ministria) Federal i Punëve të Jashtme.

Ndryshe, bëhet fjalë për një shtim prej 21’784 personash të kësaj kategorie.

Kjo është një rritje më e theksuar në krahasim me vitet pararendëse kur numri i zviceranëve “të jashtëm” rritej zakonisht për 2% në vit. %.

Te 73.5% të zviceranëve që jetojnë jashtë Zvicrës bëhet fjalë për persona me dyshtetësi.

Më së shumti shtetas të Zvicrës, sipas  ministrisë jetojnë në Francë. Në vitin 2016 numri i tyre për herë të parë ka kaluar mbi 200 mijë. Pas Francës vjen Gjermania, ku jetojnë 90 mijë zviceranë dhe në vendin e tretë për nga numri i helvetëve që strehon është SHBA-ja me 80 mijë sish. Në Itali jetojnë 50 mijë zviceranë thuhet më tutje në njoftimin e ministrisë.

Marrë sipas kontinenteve, më së shumti shtetas të Zvicrës, gjegjësisht 60% të atyre që janë jashtë, jetojnë në Evropë. Në kontinentin amerikan jetojnë 25% ndërsa të tjerët në Azi, Oqeani dhe Afrikë.

Shikuar nga aspekti i rritjes së shtuar të komunitetit të zviceranëve jashtë vendit, mund të vihet në përfundim se aktualisht më shumë ka zviceranë që e braktisin Zvicrën se sa të tillë që kthehen në Zvicër. Megjithatë, të dhënat më të detajuara lidhur me këto lëvizje demografike do të publikohen në fund të muajit gusht 2017 nga Zyra Federale e Statistikës.