Karnavalistët fyejnë rëndë shqiptarët dhe zezakët

Ata ishin të veshur si pastrues dhe e mbanin emërtimin “Spastrim-Clean”. Me moton “Partneri juaj efikas për një Zvicër të pastër”, një grup prej 6 deri 8 karnavalistësh kanë parakaluar vikendin e kaluar rrugëve të lokalitetit Mümliswil

Në parakalimin e karnavaleve në Mümliswil të Kantonit të Soloturnit është shpërndarë edhe një afishe me përmbajtje raciste dhe kundër shqiptarëve e cila ka shkaktuar indinjatë .

Ata ishin të veshur si pastrues dhe e mbanin emërtimin “Spastrim-Clean”. Me moton “Partneri juaj efikas për një Zvicër të pastër”, një grup prej 6 deri 8 karnavalistësh kanë parakaluar vikendin e kaluar rrugëve të lokalitetit Mümliswil. Se çfarë nënkuptonin ata me “atdheun e pastër” e kishin sqaruar ne afishen të cilën e kanë shpërndarë në lokalet e karnavaleve, transmeton albinfo.ch gazetën nordostschweiz. Në këtë afishe janë listuar simptomat për tri “sëmundje”.

Kështu, sëmundja “Albaneritis” karakterizohet me “kokat si kuti kartoni” dhe me makinat BMV M3. Ndërsa njerëzit e sëmurë nga sëmundja “Syritis” njihen nga rrobat e grisura, më së shpeshti nga telat me gjemba. Ndërsa “Negritis” (për zezakët) është “shumë i rrezikshëm dhe natën i padukshëm”.

Ekspertët e racizmit kanë drejtuar kritika të ashpra ndaj kësaj afisheje, përcjell albinfo.ch. Sipas Dominic Pugatsch nga Fondacioni kundër racizmit dhe antisemitizmit, në karnavale edhe lejohet një masë e caktuar lirie për palaçot që marrin pjesë , por një aksion si ky është i pashije dhe i shëmtuar”.

Karnavalet kanë pasur gjithmonë edhe një funksion prej ventili përmes të cilit populli ka shfryrë pakënaqësinë e vet, Por kjo nuk guxon të keqpërdoret për t`i fyer njerëzit. Dhe në veçanti jo përmes këtyre klisheve të vjetra dhe të marra, si në afishen e përmendur.

Nga ana tjetër, komiteti i karnavaleve , që është përgjegjës për ato në Mümliswil, i ka thënë gazetës se nuk ka informacione rreth ngjarjes. Por, sikur ta dinte, nuk do ta toleronte.