Për 6 muaj janë gjobitur vetëm 6 gra për bartjen e burkas

Ligji i hyrë në fuqi më 1 korrik 2016 e ndalon mbulesën e plotë të trupit apo edhe atë të fytyrës, e cila i lë të lirë vetëm sytë. Për këtë ndalim, në vitin 2013 pati votuar shumica e qytetarëve me të drejtë vote në kanton

Ndalimi i burkës në Kantonin jugor të Zvicrës që ka hyrë në fuqi në korrik të vitit të kaluar, nuk ka sjellë shumë punë për autoritetet e drejtësisë. Gjatë gjithë gjashtë muajve është iniciuar procedurë penale ndaj gjithsej gjashtë grave që kanë bartur mbulesën e plotë, përkundër ndalimit me ligj, shkruan srf.ch. Në dhjetë raste të tjera janë bërë vetëm vërejtje nga ana e policëve. Këtë njoftim e ka bërë sot Qeveria e Kantonit të Tiçinos.

Në ditën kur ka filluar të zbatohet ligji i ri, në Lugano kanë protestuar një biznesmen me prejardhje algjeriane  (Rachid Nekkaz) së bashku me konvertiten zvicerane Nora Ili të veshur me burka, transmeton albinfo.ch. Kjo e dyta, së bashku me të bijën janë paraqitur vetë në polici për të kërkuar gjobitjen. Ndërsa Nekkaz është zotuar se do të paguajë gjobat për të gjitha gratë që do të dënohen për bartje të mbulesës myslimane.

Siç dihet, ligji i hyrë në fuqi më 1 korrik 2016 e ndalon mbulesën e plotë të trupit apo edhe atë të fytyrës, i cili i lë të lirë vetëm sytë. Për këtë ndalim, në vitin 2013 pati votuar shumica e qytetarëve me të drejtë vote në kanton.

Një iniciativë e ngjashme, për ndalimin e burkës është duke u nënshkruar edhe në nivel nacional dhe për të pritet po ashtu të votohet. Por për të plotësuar kushtet për votim, komiteti i kësaj iniciative duhet që deri më 15 shtator 2017 të grumbullojë së paku 100 mijë nënshkrime të vlefshme.