2000 të mitur pa prindër kanë kërkuar azil gjatë vitit 2016

Gjatë vitit që shkoi, në Zvicër kanë kërkuar azil afër 2000 të mitur. Shumica janë tinejxherë por në mesin e tyre ka edhe fëmijë të vegjël

Me gjithë rënien e madhe të numrit të azilkërkuesve që gjatë vitit 2016 erdhën në Zvicër, mbetet shqetësuese dukuria e të miturve ose fëmijëve që vijnë këtu të pashoqëruar nga prindërit. Nga hulumtimet që ka bërë radio SRF, rezulton se gjatë vitit që shkoi, në Zvicër kanë kërkuar azil afër 2000 të mitur. Shumica janë tinejxherë por në mesin e tyre ka edhe fëmijë të vegjël, transmeton albinfo.ch. Vetëm në vitin 2015 ka pasur më shumë fëmijë dhe të rinj që kanë kërkuar azil në Zvicër.

Në vitin 2015 Berna zyrtare pati filluar që të miturit e pashoqëruar t`i shpërndante edhe në kantonet që nuk kanë përvojë në punë me ta. Konferenca e drejtorëve kantonalë për çështje Sociale (SODK) për këtë arsye kishte dhënë rekomandime të cilave kantonet duhet t`u përmbahen.

Sipas bilancit të ndërmjetmë, aktualisht pothuaj të gjithë të miturit e pashoqëruar, janë strehuar në mënyrë të veçantë dhe jo së bashku me azilkërkuesit e rritur, pra është vepruar sipas rekomandimeve të SODK.

Por ajo që mbetet problematike është se si të integrohen në tregun zviceran të punës refugjatët e rinj e të pashoqëruar. Sekretarja e përgjithshme e SODK, Gaby Szöllösy tërheq vërejtjen se “në rast se nuk ka sukses kjo, ata do të mbeten të varur nga ndihmat sociale dhe kjo do të ketë kosto të lartë”. Edhe tash kantonet kanë mungesë të theksuar të mjeteve për azilkërkuesit e rinj, të pashoqëruar.