“Western Union”, 586 milionë dënim për pastrim parash

“Western Union” është pajtuar të paguajë 586 milionë dollarë si dënim dhe ka pranuar se ka injoruar faktin se shërbimi i tyre është përdorur për veprimtari kriminale, kryesisht për pastrimin e parave dhe mashtrim, sipas njoftimit për shtyp të Ministrisë së Drejtësisë në SHBA, raporton Bloomberg, përcjell albinfo.ch.

Me ndihmën e punonjësve të “Western Union”, emigrantët kinezë kanë përdorur këtë shërbim për dërgimin e qindra milionë dollarëve për të paguar kontrabandistët dhe të hollat kanë lëvizur në sasi më të vogla për t’iu shmangur rregullave federale për regjistrimin e transaksioneve, sqaruan autoritetet amerikane.

Prokurori konstaton se “Western Union”, të paktën për një periudhë prej pesë vjetësh dinte në lidhje me transaksionet e paligjshme të kryera me anë të këtij shërbimi.

Kompania nuk pranoi të japë ndonjë koment në lidhje me këtë marrëveshje.