Fillon shënimi i 500 vjetorit të Reformacionit në Zvicrën Gjermane

Ammann ka thënë se botën e sotme e sheh të ngjashme me atë të kohës së lindjes së reformacionit, në ndryshime. Por tash janë forcat, idetë dhe bindjet reaksionare ato që po ndeshen me idetë reformatore

Keystone

Sot, nën patronatin e ministrit Johann Schneider-Ammann dhe presidentit të kishave në nivel të vendit, Gottfried Locher kanë filluar në Zvicrën gjermane manifestimet për shënimin e 500 vjetorit të reformacionit, shkruan sda.ch. Hapja e solemniteteve me rastin e vitit jubilar ka filluar në kishën më të madhe reformiste  të Cyrihut Grosmünster.

Ammann ka thënë se botën e sotme e sheh të ngjashme me atë të kohës së lindjes së reformacionit, në ndryshime. Por tash janë forcat, idetë dhe bindjet reaksionare ato që po ndeshen me idetë reformatore, transmeton albinfo.ch. Pesimizmi në fushë të teknologjisë dhe shkencës ose edhe antiliberalizmi janë sërish në formë, ka thënë ai.

“Globalizimi fillestar dhe reformacioni na kanë dhënë aq shumë, sa që kanë bërë të ndryshohet dhe të bëhet më e vlefshme për t`u jetuar e më intensive koha jonë në këtë planet”.

Ndërsa Locher ka theksuar se reformacioni e ka ndikuar në masë përcaktuese shtetin modern dhe shoqërinë liberale, duke krijuar kështu një unitet kulturor. Këtë konsensualitet nuk guxojmë ta dorëzojmë. Liria është konsesnualiteti në Zvicër dhe është një pjesë e ADN-së së helvetizmit dhe reformacionit, përcjell albinfo.ch. Ai më tutje ka kërkuar që të dilet qartë dhe hapur, për të mirën e të gjithë njerëzve në vendin tonë, para forcave të cilat duan ta çmontojnë lirinë dhe vetëpërgjegjësinë.

Në kuadër të manifestimeve, është bërë një projeksion me dritë në muret e kishës së përmendur, në të cilin është prezantuar portreti i Zwingli-t, themeluesit të reformacionit në Zvicrën gjermane, dhe personalitetit me të cilin identifikohet qyteti i Cyrihut “Zwingli-Stadt).