Zjarret nën kontroll, por shuarja e plotë është ende larg

Ndonëse zjarri në Graubünden është arritur të izolohet, deri në shuarjen e plotë të zjarrit duhet të pritet edhe dy deri katër ditë!

Keystone

Janë duke vazhduar edhe më tutje përpjekjet e zjarrfikësve dhe trupave tjera të angazhuara për shuarjen e zjarreve që kanë kapluar pyjet në pjesën jugore të Zvicrës. gjendja vazhdon të jetë e tendosur por ajo mbahet nën kontroll, bëjnë të ditur në Policinë Kantonale të Graubündenit. Sipas tyre, deri në shuarjen e plotë të zjarrit duhet të pritet edhe dy deri katër ditë!

Dobësimi i erërave që frynin në këtë regjion (Mesocco dhe Soazza) e ka qetësuar deri diku gjendjen, transmeton albinfo.ch. Nga ana tjetër zjarri në afërsi fshatit, në një masë të konsiderueshme është shuar.

Në vatrën tjetër të shpërthimit të zjarrit, në Leventina të Tiçinos, zjarri është arritur të izolohet. Në shuarje të zjarrit janë duke punuar gjithsej shtatë helikopterë të ushtrisë, ndërsa atyre u kanë ardhur në ndihmë edhe katër helikopterë privatë.

Bëhet fjalë për njërin ndër aksionet më të mëdha për shuarje të zjarrit në historinë e Zvicrës, thuhet në njoftimin e Policisë së Kantonit të Tiçinos.