Gjithnjë më tepër preferohet shërbimi civil në vend të atij ushtarak

Sa më shumë njerëz që përcaktohen për shërbimin civil aq më pak prej tyre mbeten në dispozicion të ushtrisë”, ka thënë zëdhënësi i ushtrisë, Daniel Reist

Forcat e Armatosura të Zvicrës këtë vit pritet të dështojnë në realizimin e qëllimit që shkollën e rekrutëve ta mbarojnë, siç është planifikuar, 18.500 veta. Por në të njëjtën kohë varianti civil i shërbimit ushtarak po paraqitet gjithnjë më i preferuar për të rinjtë zviceranë, shkruan srf.ch. Sipas statistikave më të reja, këtë vit shërbimin civil në kuadër të ushtrisë duan ta kryejnë më shumë se 6000 meshkuj të rinj, duke i ikur kështu shkollës së rekrutimit ose shërbimit ushtarak në kuptimin klasik.

Kështu, ushtria tashmë ka arritur në konstatimin se shërbimi civil është së tepërmi tërheqës, përcjell albinfo.ch. “Sa më shumë njerëz që përcaktohen për shërbimin civil aq më pak prej tyre mbeten në dispozicion  të ushtrisë”, ka thënë zëdhënësi i ushtrisë, Daniel Reist.

Në fakt prej pesë vitesh jemi dëshmitarë të një trendi sipas të cilit çdo vit ka më tepër të rinj që përcaktohen për shërbimin civil. Zyra qendrore e shërbimit civil thotë se është për brengosje fakti se jo çdonjëri pranon të kalojë në shërbimin klasik ushtarak pa ju ofruar fillimisht shansi i shërbimit civil.