Zvicra vendos të strehojë edhe 2000 refugjatë të tjerë sirianë

Këta refugjatë të cilët do të pranohen gjatë dy viteve të ardhshme, i takojnë një kategorie veçanërisht të lëndueshme. Këtu hyjnë kryesisht të moshuarit, të sëmurët dhe familjet me fëmijë

Këshilli Federal, duke mbështetur qëndrimin e ministres së drejtësisë dhe Policisë, Simonetta Sommaruga, ka vendosur që t`u ofrojë strehim edhe 2000 të përndjekurve tjerë nga lufta civile në Siri, shkruan srf.ch

Këta 2000 refugjatë të cilët do të pranohen gjatë dy viteve të ardhshme, i takojnë një kategorie veçanërisht të lëndueshme. Këtu hyjnë kryesisht të moshuarit, të sëmurët dhe familjet me fëmijë, transmeton albinfo.ch. Do të strehohen para së gjithash njerëzit të cilët kanë ikur në vendet fqinje me Sirinë por atje nuk mund të qëndrojnë më gjatë.

Sipas të dhënave të Komisariatit të Lartë të OKB-së për Refugjatë (UNHCR), vetëm në Liban jetojnë më shumë se një milion refugjatë nga Siria ndërsa në Jordani, rreth 650 mijë sish.

Ashtu siç e kërkojnë rregullat, refugjatët para se të nisen për në Zvicër do të merren në pyetje. Secila dosje e tyre do të shqyrtohet nga Shërbimi Informativ i Federatës (NDB)