Këshilli i Sigurimit debaton për Kosovën

Franca, e cila kryeson me Këshillin e Sigurimit, nuk e ka futur në rend dite kërkesën e Serbisë për trafikim me organe njerëzore

Në Këshillin e Sigurimit të Kombeve të Bashkuara sot debatohet për zhvillimet e fundit në Kosovë. Këshilli do të shqyrtojë raportin tre mujor të sekretarit të Përgjithshëm Ban Ki Moon.

Kosovën në mbledhjen e Këshillit e përfaqëson ministri i Jashtëm, Enver Hoxhaj.

Në raportin e tij, Ban Ki Mun shpreh kënaqësi për fillimin e dialogut Prishtinë-Beograd, duke vlerësuar se mbajtja e rregullt e takimeve me ndihmën e BE-së është zhvillim inkurajues, njofton rtklive.

Sekretari i përgjithshëm i OKB-së u bën thirrje të dyja palëve ta forcojnë angazhimin dhe t’i dyfishojnë përpjekjet për harmonizimin e qëndrimeve në çështjet kryesore të bisedimeve.

Sekretari i përgjithshëm i OKB-së gjithashtu bën thirrje për hetime të paanshme dhe të pavarura mbi trafikimin e organeve, si dhe për një program të fuqishëm të mbrojtjes së dëshmitarëve.

Në raportin e tij për periudhën prej 16 janarit e deri më 15 prill të këtij viti, sekretari i përgjithshëm, Ban Ki-Mun, theksoi se “UNMIK-u është i gatshëm ta zgjerojë bashkëpunimin e tij të plotë me çfarëdo hetimi, që mund të udhëhiqet”.

Ndërkohë, bëhet e ditur se Franca, e cila aktualisht kryeson me Këshillin e Sigurimit të Kombeve të Bashkuara, nuk e ka futur në rend dite kërkesën e Serbisë për trafikim me organe njerëzore në Kosovë.

Prandaj në mbledhjen e sotme të KS në rendi të ditës do të jetë vetëm raporti i rregullt tremujor i kreut të OKB së Ban Ki Mun për gjendjen në Kosovë. Kosovën në këtë debat e përfaqëson ministri i Punëve të Jashtme Enver Hoxhaj.