Zurich e mban peng Sadikun

Të hënën futbollistët e Zurichut do të nisin përgatitjet për sezonin e ri, ku duhet të jetë i pranishëm edhe Sadiku, edhe pse ishte ai shkaktari kryesor i rënies nga kategoria e klubit që zotëron kartonin e tij

Armando Sadiku tregoi paraqitje shumë të mira në Kampionatin Evropian me Shqipërinë, por e ardhmja e tij është shumë e pasigurt, shkruan albinfo.ch.

Ai është futbollist i Zurich, por në gjashtë muajt e fundit ishte huazuar në Vaduz, skuadër kjo që arriti të mbijetojë në elitën e futbollit zviceran, derisa Zurich jo. Madje, Vaduzit i ndihmuan shumë golat e Sadikut për të mbijetuar.

Të hënën futbollistët e Zurichut do të nisin përgatitjet për sezonin e ri, ku duhet të jetë i pranishëm edhe Sadiku, edhe pse ishte ai shkaktari kryesor i rënies nga kategoria e klubit që zotëron kartonin e tij.

Vetë lojtari nuk ka ndërmend të qëndrojë te kjo skuadër, madje është shprehur hapur se ëndrra e tij është të luajë në Bundesligë ose në Serinë A, por presidenti Ancillo Capena këmbëngul se sulmuesi shqiptar është nën kontratë me Zurichun deri në vitin 2018 dhe mund të largohet vetëm nëse për kartonin e tij paguajnë 9 milionë franga zvicerane.

Vështirë se mund të gjendet një klub që ofron një shumë kaq të lartë për Sadikun, kështu që pritet lufta në distanca të ndizet edhe më shumë gjatë ditëve në vijim.