Gjykata Kushtetuese e “rrëzon” Pacollin

Gjykata Kushtetuese e Kosovës e ka shpallur jokushtetuese zgjedhjen e Behgjet Pacolli president

Kjo gjykatë ka kumtuar sot se e ka pranuar ankesën e LDK-së lidhur me mënyrën e zgjedhjes së Pacollit, duke vlerësuar kështu se vendimi për zgjedhjen e tij ka qenë jokushtetues.

“Gjykata Kushtetuese, njëzëri, vendosi që të shpall Kërkesën të pranueshme dhe, me shumice votash, dhe me dy gjyqtar mospajtues, shpall se Vendimi i Kuvendit të Republikës së Kosovës, Nr. 04-V-04, lidhur me zgjedhjen e Presidentit të Republikës së Kosovës, me datë 22 shkurt 2011, është jo kushtetues pasi që është në kundërshtim me kërkesat e nenit 86 të Kushtetutës së Republikës së Kosovës dhe parimet demokratike të mishëruara aty”, thuhet në një komunikatë për medie të lëshuar nga Gjykata Kushtetuese e Kosovës.

Vendimi i lëndës me numër KO 29/11 të ashtuquajtur “Sabri Hamiti dhe deputetë të tjerë”, do t’u dërgohet palëve me shkrim në një afat sa më të shkurtër.

Me këtë, presidenti Pacolli duhet të jap dorëheqje, ndërsa, në bazë të Kushtetutës, duhet të shpallen zgjedhje të jashtëzakonshme parlamentare.