Hidhet poshtë ankesa e Bashkim Berishës

Gjykata e Kasacionit në vendimin e saj ka shkruar se "ankesa nuk qëndron, në asnjë pikë të saj"

Bashkim Berisha, i cili është duke vuajtur dënimin me 14 vjet burg për vrasjen e një shqiptari nga Maqedonia, kishte bërë një ankesë për anulimin e vendimit të Gjykatüës së Lartë të Cyrihut, të shqiptuar ndaj tij në gusht të vitit 2009.

Gjykata e Kasacionit ka hedhur poshtë ankesën e tij, siç deklaron sekretari i përgjithshëm i kësaj gjykate, Viktor Lieber për portalin 20 Minutenonline.

I mbiquajtur “vrasësi nga vendparkimi”, Bashkim Berisha, sot 30 vjeç, ka qenë ish kampion botëror në thaiboks. Pas vrasjes së bërë në shkurt të vitit 2005, ai ishte arratisur dhe për një kohë kishte jetuar në Kosovë. Dy vite më parë Berisha ishte ekstraduar në Zvicër dhe i ishte nënshtruar akuzës për vrasje.

Në ankesën e tij, Berisha e konsideron vendimin e gjykatës si arbitar. Sipas tij gjyqi kishte shkelur dispozitën bazë “in dubio pro reo (në rast dyshimi – vendoset në favor të të paditurit). Po ashtu, ai në ankesë ka vlerësuar arsyetimin e vendimit si kundërthënës dhe ekspertizën psikiatrike si të mangët.

Ndërsa Gjykata e Kasacionit në vendimin e saj ka shkruar se “ankesa nuk qëndron, në asnjë pikë të saj”.

Bashkim Berisha mund të ushtrojë ankesë ndaj këtij vendimi edhe në shkallën më të lartë, në Gjykatën Federale. Por ande nuk dihet nëse ai do ta bëjë këtë ose jo.