71% të zviceranëve kundër rrogave pa punuar

Është interesant trendi i iniciativës “për të ardhura të pakushtëzuara”, siç quhet zyrtarisht iniciativa për "rroga pa punuar". 71% të zviceranëve të anketuar janë kundër saj, 26% janë pro dhe 3% të papërcaktuar

Një sondazh i realizuar nga Instituti për Hulumtim të Opinionit GFS Bern tregon trendët më të fundit në lidhje me votimet që do të mbahen më 5 qershor për iniciativat në nivel nacional.

Në bazë të këtij sondazhi, për iniciativën “Pro Service Public” do të votonin 46 për qind e qytetarëve me të drejtë vote, gjegjësisht 12% më pak se një muaj më parë. Kundër saj janë përcaktuar 41% ose 15% më shumë se para një muaji, shkruan srf.ch. Megjithatë, autorët janë të mendimit se trendi shkon më shumë nga pranimi se sa nga refuzimi i iniciativës.

Vetëm mbështetësit e Partisë së Gjelbër janë me shumicë (69%) pro iniciativës. Te SVP-ja janë 39% të tillë.

Është interesant trendi i iniciativës “për të ardhura të pakushtëzuara”, siç quhet zyrtarisht ajo që në popull njihet më shumë si iniciativa për “rroga pa punuar”. 71% të zviceranëve të anketuar janë kundër saj, 26% janë pro dhe 3% të papërcaktuar, transmeton albinfo.ch. Përgjithësisht në këtë pikë nuk ka ndodhur ndonjë ndryshim në mes dy sondazheve të kryera.

Siç dihet, kjo iniciativë kërkon që njerëzit të paguhen pavarësisht nëse punojnë ose jo. 2500 franga në muaj është pagesa për të rriturit.

Iniciativa në fjalë ka vetëm në mesin e mbështetësve të Partisë së Gjelbër një shumicë, gjegjësisht 64% janë në favor të saj. Mbështetësit e Partisë Socialdemokrate (SP/PS) kanë qenë 50 % në favor dhe 47% kundër. Ndërsa te partitë e djathta përqindja e kundërshtarëve është shumë e lartë. Te SVP-ja ajo është 86%, te CVP-ja 82% dhe te FDP-ja 80%.

Iniciativën për ndryshimin e Ligjit për Azilin sipas sondazhit më të fundit, sikur votimi të bëhej javën e kaluar, do ta votonion 60% e qytetarëve me të drejtë vote, përcjell albinfo.ch. 29% do të ishin kundër dhe 11% të pavendosur.

Është interesante se këtë iniciativë të SVP-së e mbështesin vetëm 43% të anëtarëve të kësaj partie! Te partitë tjera ka një shumicë pro. Te SP/PS: 73%, FDP/PLR 70%, CVP/PDC 66% dhe Partia e Gjelbër, 57%.