Kosova humb “betejën” në Këshillin e Evropës

Rezoluta e Asamblesë së Këshillit të Evropës për Kosovën, është miratuar pasditen e së enjtes së bashku me katër amendamente të propozuara nga Serbia

Pas disfatës për anëtarësim në UNESCO, Kosova ka pësuar edhe një disfatë tjetër në planin diplomatik dhe të njohjes ndërkombëtare në raport me Serbinë. Kjo, pasi rezoluta e Asamblesë së Këshillit të Evropës për Kosovën, është miratuar pasditen e së enjtes së bashku me katër amendamente të propozuara nga Serbia.

Beogradi paraqiti një ditë më parë në Komision amendamente e veta në lidhje me Marrëveshjen Kosovë-Serbi për Asociacionin e komunave serbe, për mbrojtjen e trashëgimisë kulturore, edhe pse Kosova nuk u bë anëtare e UNESCO-s dhe për kalimin e disa kompetencave tek UNMIK në marrëdhënie me organizma të tilla si Interpol dhe Europol.

Këto amendamente u miratuan mëngjesin e së enjtes në Komision e më pas u paraqitën zyrtarisht si rezolutë nga Komisioni, raporton TCH. Por, përkundër kundërshtimit nga delegatët shqiptarë, të mbështetur edhe nga deputetët nga Britania, Turqia, Hungaria dhe Suedia, amendamentet serbe kaluan.

Përfaqësuesit e Shqipërisë, që kanë të drejtë vote, të ndihmuar nga përfaqësuesi i Suedisë, propozuan a amendamente që eliminonin kërkesat e paraqitura nga Serbia. Por, fatkeqësisht, të gjitha amendamente janë rrëzuar. Amendimi që rikthente disa nga standardet e para pavarësisë në lidhje me marrëdhëniet me Europol dhe Interpol, janë rrëzua vetëm për një votë.

Amendamentet e propozuara nga kryetari i delegacionit suedez, social-demokrati Jonas Gunnarson, u mbështeten nga përfaqësuesit shqiptare, Valentina Leskaj, Petrit Vasili, Namik Dokle dhe Oerd Bylykbashi, por në fund përfaqësuesit serbë e fituan betejën. Në sallë mungoi përfaqësuesja shqiptare nga Maqedonia, Ermira Mehmeti. Në këtë takim ka munguar edhe vetë hartuesi i rezolutës për Kosovën, reporteri spanjoll Augustin Conde.

Ndryshe, draft rezoluta për Kosovën e hartuar nga reporteri, Agustin Conde (deputet spanjoll i Partisë së Djathtë Spanjolle), bën një vlerësim pozitiv të arritjeve në Kosovë në fushat e demokracisë dhe forcimit të ligjit. Draft-rezoluta nënvizon në përfundim të saj propozimin shumë të rëndësishëm mbi ngritjen e nivelit te dialogut te Asamblesë Parlamentare te KiE me Kuvendin e Kosovës duke bërë shumë të afërt afrimin e Kosovës me Këshillin e Evropës.