Serbia do të gjendet nën trysninë e BE-së për Kosovën*

Ish–ambasadori i Rusisë i bindur se Serbia do të gjendet nën trysninë e BE-së për pranimin e pavarësisë së Kosovës

Në një intervistë të tij për « Sputnjik » ish-ambasadori i Rusisë në Serbi, Aleksander Konuzin, shpreh drojën e tij se BE-ja do ta shtojë trysninë e saj ndaj Serbisë për njohjen faktike të pavarësisë së Kosovës.

„ Jam i bndur se BE-ja do të kërkojë nga Serbia njohjen e pavarësisë së Kosovës. Tjetër çështje është se si do ta kërkojë ajo këtë, ndoshta jo në mënyrë të drejtpërdrejtë. Por, trysnia gjithsesi se do të rritet. Ma merr mendja se serbëve do t’ju imponohen formula të tilla, të cilat në fund mundësojnë që qëndrimi i saj të interpretohet si njohje faktike e pavarësisë së Kosovës“, deklaroi Konuzin për „Spjutnik“.

Sipas tij kjo mund të shihet edhe nga fakti se edhe pse Serbia është kandidat për pranim në BE, ajo është nën trysninë  e vazhdueshme të bashkësisë ndërkombëtare.

„Me këtë mendoj jo vetëm për marrëdhëniet e saj me Rusinë dhe për futjen e sanksioneve kundër saj, por edhe në çështjen  e Kosovës, si dhe për çështjen historike të asaj që ndodhi në Srebrenicë“, thekson diplomati rus.

Sipas tij çështja  e Kosovës është një çështje parimore e Serbisë, duke shtuar se pozicionin më të denjë sa i përket kësaj çështjeje e mban Kisha Ortodokse Serbe.

Duke folur më tej për marëdhëniet e Rusisë me Serbinë, Konuzin shpreh keqardhje për dështimin e projektit të furnizimin me gaz nga Rusia të quajtur „Rrjedha e Jugut“ për promovimin e të cilit ai kishte punuar shumë gjatë kohës së shërbimit të tij në Beograd.

* Pikëpamjet e shprehura në këtë opinion shprehin mendimet e autorit dhe nuk reflektojnë domosdoshmërisht mendimet e redaksisë.