Shtim i madh i interesimit të zviceranëve për armë

Me rritjen prej 70 për qind, trendi i mbajtjes dhe blerjes së armëve ka marrë hov më së shumti në kantonin Vaud.

Gjatë vitit që po e lëmë pas, zviceranët kanë kërkuar dukshëm më shumë leje për të mbajtur armë se në vitin paraprak, gjegjësisht është shtuar edhe blerja e armëve.

Siç tregon një sondazh i realizuar në 12 kantone nga emisioni «10vor10» i televizionit të transmetuesit publik srf, rritja në këto kantone ka qenë mesatarisht rreth 20 për qind. Por, me rritjen prej 70 për qind, trendi i mbajtjes dhe blerjes së armëve ka marrë hov më së shumti në kantonin Vaud. Kështu, përderisa në vitin 2014 ishin bërë 2427 kërkesa për mbajtje të armës, në vitin 2015 numri i tyre është ngritur në më shumë se 4200.

Kritik ndaj këtij trendi është treguar në emisionin «10vor10» Martin Boess, drejtor i Qendrës Zvicerane për parandalimin e krimit. Boess ka thënë se sa më shumë armë që të ketë në qarkullim, aq më i madh bëhet rreziku për popullatën.