Katër shqiptarë akuzohen për tregti droge dhe pastrim parash

Policia e Kantonit të Bernës ka zbuluar një rrjet të fuqishëm të tregtisë me heroinë. Vetëm me rastin e arrestimit të kryer në këtë kanton janë konfiskuar një kilogram heroinë dhe një sasi materie për përzierje të drogës si dhe disa dhjetëra mijë franga para, shkruan bernerzeitung.ch.

Në gjithë aksionin janë arrestuar katër persona, tre nga të cilët vazhdojnë të qëndrojnë në burg në këtë kanton, bën të ditur prokuroria kantonale për detyra të veçanta e Policisë Kantonale të Bernës. I katërti, shtetas shqiptar në moshën 36 vjeçare, është kapur në kantonin e Tesinës nga policia kufitare.

Policia i kishte filluar hetimet që në verën e vitit 2014, transmeton albinfo.ch. Pas disa muajsh, në dhjetor të atij viti ishin kapur tre persona të dyshuar ndërsa në maj të vitit 2015 edhe personi i katërt.

Personat e arrestuar në Kantonin e Bernës janë dy shtetas të Shqipërisë, 27 përkatësisht 24 vjeçarë si dhe një shtetas i Kosovës, 37 vjeçar. Policia është e mendimit se ata janë marrë për një kohë të konsiderueshme dhe në mënyrë të vazhdueshme me tregtimin e drogës. Vetëm në periudhën në mes të marsit dhe dhjetorit 2014 ata akuzohen të kenë tregtuar rreth 4 kilogramë heroinë.

Te shqiptari i arrestuar në Tesinë janë gjetur 80 mijë franga. Ai fajësohet se, nga marsi 2014 deri në majin e vitit 2015 ka mbledhur paratë e më shumë se 100 korrierëve të drogës, duke grumbulluar gjithsej rreth 500 mijë franga.

Të katër personat fajësohen për shkelje të rëndë të ligjit mbi lëndët narkotike dhe për pastrim parash. Së shpejti ata do të dalin para gjyqit për t`u përgjigjur për këto vepra.