Bullgaria, vendi më i varfër i BE-së, rrezikon të mbetet pa mjekë

Gazeta bullgare “168 chasa” parashikon se vendi më i varfër i BE-së, Bullgaria, do të mbetet pa mjekë në vitin 2020. Që nga viti 2012 rreth 2.000 mjekë bullgarë ia kanë kthyer shpinën vendit të tyre. Përveç kësaj, gjithnjë e më shumë bullgarë të rinj emigrojnë menjëherë pas përfundimit të studimeve të mjekësisë. Ndërkohë vetëm rreth 500 mjekë të huaj punojnë në Bullgari.

Sot vendi me shtatë milionë banorë ka vetëm 28.000 mjekë. Shtatë vjet më parë kishte 35.000. Nuk është çudi që shumë spitale bullgare vuajnë nga mungesa akute e personelit. Rreth një e katërta e mjekëve që punojnë janë mbi 60 vjeç.

Neonatologët janë një gjë e rrallë në Bullgari. Sipas të dhënave të shoqatës bullgare të mjekëve, në gjithë vendin kanë mbetur vetëm 42 mjekë të tillë dhe vetëm 28 kirurgë pediatër. Për përmirësimin e gjendjes nuk ka asnjë perspektivë, sepse rreth 90 për qind e mjekëve të rinj, sipas sondazheve, duan të emigrojnë menjëherë pas ose madje para kryerjes së stazhit si mjekë.