4 migrantë shqiptarë tentojnë ta kalojnë La Manche me aeroplan privat

Të arrestuarit mund të të akuzohen për thyerje të ligjit për të huajt pa leje qëndrimi si dhe bandë të organizuar, ka deklaruar ndihmësprokurori i Boulogne-sur-Mer (Veri), Philippe Sabatier

Katër migrantë shqiptarë kanë tentuar të futen në territorin e Britanisë së Madhe me një aeroplan privat. Është hera e parë që konstatohet një tentim i tillë, raporton albinfo.ch. Personat në fjalë janë ndaluar të hënën buzë pistës së aeroportit, në veri të Francës

Në momentin e ndalimit të tyre, piloti kishte në duar komandat e avionit, në pistën e aeroportit “Marck”, jo larg portit të Calais të Francës, i cili është pikësynim i mijëra migrantëve, me shpresë për ta kaluar prej aty La Manche dhe të futen në Britani të Madhe, njofton albinfo.ch.

Piloti si dhe dy trafikantët, të tre britanikë, janë ndaluar po ashtu. Të arrestuarit mund të të akuzohen për thyerje të ligjit për të huajt pa leje qëndrimi si dhe bandë të organizuar, ka deklaruar ndihmësprokurori i Boulogne-sur-Mer (Veri), Philippe Sabatier.

Sipas prokurorit, dy nga migrantët, një burrë dhe një grua, do të vendosen në një qendër arresti administrativ. Mirëpo, hetuesit i kanë “humbur gjurmët” e dy migrantëve të tjerë shqiptarë, një nënë me fëmijën e saj, të cilët janë dërguar në një spital të rrethit.

Prokurori ka thënë se kjo është hera e parë e tentimit të kalimit të migrantëve përmes rrugëve ajrore, përcjell albinfo.ch.